பாலிவுட் சினிமாவின் கவர்ச்சி நடிகையான சன்னி லியோன் தமிழில் நடித்துள்ள திரைப்படம் ஓ மை கோஸ்ட். இந்தப் படத்தில் சன்னி லியோன் பேயாக நடித்துள்ளார். நகைச்சுவை ஜானரில் உருவாகியுள்ள இப்படத்தில் சன்னி லியோனுடன் சதீஷ், தர்ஷா குப்தா, ஜிபி முத்து உள்ளிட்ட பலர் நடித்துள்ளனர்.
இந்தப் படத்தின் இசை வெளியீட்டு விழா சென்னையில் சமீபத்தில் நடைபெற்றது. இதில் பங்கேற்ற சன்னி லியோன் பட்டு சேலையில் பங்கேற்றார். தர்ஷா குப்தா கிளாமரான லெஹாங்கா உடையில் பங்கேற்றார். இந்நிலையில் இந்த நிகழ்ச்சியில் பேசிய நடிகர் சதீஷ், தர்ஷா குப்தாவின் உடையை விமர்சித்தார்.
மும்பையில் இருந்து வந்துள்ள நடிகை சன்னி லியோன், நம் கலாச்சாரத்தின் சேலையை அணிந்து வந்துள்ளார். நம் கோயம்புத்தூர் பெண்ணான தர்ஷா குப்தாவின் டிரெஸையும் பாருங்கள் என அவரது உடையை குறிப்பிட்டு பேசினார். சதீஷின் இந்த பேச்சு பிரபலங்கள் பலரும் கண்டனம் தெரிவித்து வருகின்றனர்.அந்த வகையில், பிரபல பாடகியான சின்மயியும் நடிகர் சதீஷின் பேச்சுக்கு கண்டனம் தெரிவித்துள்ளார்.
இதுதொடர்பாக அவர் பதிவிட்டுள்ள டிவிட்டில், ஒரு பெண்ணை சுட்டிக் காட்டி அவர் கலாச்சாரத்திற்கு ஏற்ப ஆடை அணியவில்லை என ஒரு மாஸ் கூட்டத்தில் ஒரு ஆண் பேசுகிறார்.ஆண்களின் இந்த நடத்தை எப்போது நிறுத்தப்படும்? இது வேடிக்கை இல்லை. என பதிவிட்டு சாடியுள்ளார். சின்மயின் இந்த பதிவுக்கு பலரும் ஆதரவு தெரிவித்துள்ளனர். பெண்கள் எந்த மாதிரியான உடையை அணிய வேண்டும் என்பது அவரவர் விருப்பம் என சதீஷை திட்டி தீர்த்து வருகின்றனர்.
