சுசீந்திரன் இயக்கத்தில் கடந்த 2009 ஆம் ஆண்டு வெளியான திரைப்படம் தான் வெண்ணிலா கபடி குழு. விமர்சன ரீதியாகவும், வசூல் ரீதியாகவும் மிகப்பெரிய வெற்றியை பெற்ற இப்படத்தின் மூலம் பலருக்கு திருப்புமுனை ஏற்பட்டது.இப்படத்தில் ஹீரோவாக நடித்த விஷ்ணு விஷால், நகைச்சுவை நடிகர் சூரி ஆகியோர் இப்படத்தின் மூலம் பிரபலமானார்கள். மேலும் இப்படத்தில் முக்கிய கதாபாத்திரத்தில் நடித்தவர் தான் வைரவன்.
இவர் விஷ்ணு விஷாலின் குள்ளநரி கூட்டம் படத்திலும் நடித்துள்ளார்.இந்நிலையில் உடல்நலக்குறைவால் கடந்த சில மாதங்களாக அவதிப்பட்டு வந்த நடிகர் ஹரி வைரவன் அண்மையில் காலமானார். அவரது மறைவு திரையுலகினர் மத்தியில் பெரும் சோகத்தை ஏற்படுத்தியது.அவரது மனைவிக்கும் குழந்தைக்கு திரையுலகினர் உதவ வேண்டும் என நெட்டிசன்கள் குரல்கொடுத்து வந்த நிலையில், தற்போது நடிகர் விஷ்ணு விஷால், ஹரி வைரவனின் குழந்தையின் கல்விச் செலவை தான் முழுவதுமாக ஏற்றுக்கொள்வதாக அறிவித்துள்ளார்.
இதுகுறித்து அவர் பேசுகையில் ,வைரவனுடன் நான் கடந்த ஆறு மாதங்களாக பேசிக்கொண்டுதான் இருந்தேன். என்னால் என்ன முடியுமோ அந்த உதவிகளை நான் செய்து வந்தேன். அவர் மனைவியிடம் உங்களுக்கு என்ன உதவி வேண்டுமானாலும் கேளுங்கள் செய்கின்றேன் எனவும் கூறியுள்ளேன்.
இதையடுத்து வைரவனின் குழந்தைகளின் படிப்பு செலவையும் நான் ஏற்கவுள்ளேன் என்றார் விஷ்ணு விஷால். மேலும் வைரவன் கடைசியாக தனக்கு நன்றி என வாய்ஸ் மெசேஜ் அனுப்பியதாகவும் கூறியுள்ளார் விஷ்ணு விஷால் என்பது குறிப்பிடத்தக்கது.
